Организирајте ги дигиталните фотографии еднаш засекогаш
Фотографирањето е омилена активност на многу од нас. Уживање е да си ги зачуваме сите слатки секојдневни спомени од нашиот живот, нашите успеси, патувања, нашето семејство.
Денес ви пишувам за „темната страна“ на фотографирањето, а тоа е организирањето на илјадници фотографии.
Токму заради тоа што тоа бара да се посветат многу часови, кои и онака ги немаме, огромен дел од нас се откажуваат пред да почнат.
За наша среќа, има одлични софтвери кои можат да помогнат со процесот и оваа „мачна обврска“ ќе ви биде супер забавен времеплов низ спомените.
Во само пет чекори ќе успеете да ги организирате вашите спомени. Почнуваме со наједноставниот чекор…
1. Сите на куп
Спомените ни живеат на многу локации, во мобилен, таблет, лаптоп, десктоп компјутер. Сигурно некаде имате стар телефон со стари фотографии, така? Не заборавајте на усбиња или цедиња.
Добар почеток е да ги соберете сите фотографии на едно место, дали е тоа вашиот компјутер или екстерен диск. Добра идеја е во овој момент да направите копија на уште едно место „за секој случај“.
2. Организација на фотографии
Организацијата на животните спомени може да ја направиме мануелно, со тоа што сите фотографии самите ќе ги распределите во папки или да користиме софтвер како Adobe Bridge, Google Photos, XnViewMP, Magix Photo Manager, Adobe Lightroom, колку да набројам неколку.
Според мене најдобра пракса е распределување по датуми. Јас моите фотографии ги распределувам прво по годината и потоа во папки со точен датум и опис. Но, јас редовно правам многу фотографии.
Овој систем е одличен ако ги организирате фотографиите од вашите деца, како на пример ако се подготвувате да направите фотобук за секоја година од раѓањето на вашето дете.
3. ГЕнералка на фотографии
Ако сте како мене, тогаш најголем предизвик ви е бришење на фотографии. Но ова е многу важен чекор. Јас ова не би можела да го правам рачно, немам толку трпение. Затоа тука софтверите ми се главен сојузник. Но познавам луѓе кои ова го прават рачно.
Најпрво избришете ги сите дупликати и матни, промашени фотографии. Ако користите апликации можете да си го олесните животот со опциите на рангирање, тагови и преименување на фотографии. АМИН за тоа! Ова тројство е многу важно за да можете за само неколку секунди да ги најдете посакуваните фотографии. Јас секогаш најважните фотографии ги обележувам со 5 ѕвездички и зелена боја, оние кои се ОК но недоволно добри добиваат помала оценка и немаат боја.
Ако сте хард кор олд скулер, симнувам капа, тогаш може да додадете уште фолдер два на крајот од системот и да го именувате „ок “, „екстра“, важно е вие да знаете што сакате да кажете и таму да ги ставите сите недоволно добри фотографии. Оставајќи ги во главниот фолдер најдобрите, најважните фотографии. Оние кои МОРА да ги зачувате по секоја цена.
4. Бек ап
Најважно е да имате уште една копија на вашите фотографии. Можете да ја избришете првата копија која ја направивме во почетокот и да си ги ископирате убаво организирани. Бекапот може да го направите на екстерен хард диск, на клауд, на некој друг уред.
Но, најважно е да имате печатени копии, зашто хартијата дефинитивно е најиздржлив и најверен сојузник на фотографиите. Прочитајте го постот ЗОШТО МОРА ДА ГИ ИСПЕЧАТИТЕ ВАШИТЕ ФОТОГРАФИИ? Ако се уште не сте убедени дека печатењето е најдобриот бекап.
По овој чекор е време да сте супер горди сами на себе! БРАВО!
5. Продолжете така
За да не се доведете во ваков хаос никогаш повторно, треба да се обврзете на системот и секој следен пат кога имате фотографии за зачувување да ги следите овие чекори. Така инвестираното време ќе ви се исплати и ќе си бидете слободни за да правите уште повеќе спомени.
Ве предизвикувам да почнете уште денес да се фатите за работа. Ветувам ќе ви биде драго да се навратите на сите стари спомени кои сте ги подзаборавиле. Од нив одберете ги оние најважните од најважните, кои не сакате ни на миг да ви избегаат од сеќавањата и испечатете ги.
Нема позначаен декор во домот од искрени фотографии кои молкум ја раскажуваат приказната на вашето семејство.
No Comments