КАКО САМИ ДА НАПРАВИТЕ СУПЕР ФОТОГРАФИИ ОД ВАШЕТО БЕБЕ?
Доаѓањето на нов член во семејството е прекрасен почеток, па подгответе ги вашиот апарат или мобилен телефон за да ги фотографирате сите прекрасни, спонтани моменти. Фотографиите ќе ви бидат драгоцен потсетник на првите заеднички месеци, создавајќи безвремен спомен за генарациите кои следат.
Колку и да ми недостигаат малите бебуши во студио, сакав да ве потсетам дека зачувувањето на првите спомени со бебушко се непроценливи, без разлика дали тоа ќе го направите вие дома.
Навраќајќи се наназад, повеќето фотографии кои ги имам направено од синко кога беше бебе, се направени со мобилен телефон. Неговите игри, нередите кои ги “средува“ со најмили погледи и секојдневното лудило кое што никогаш не сакам да го заборавам.
Затоа ви подготвив неколку совети за да си направите супер спомени во домашни услови.
1. Најважно е да одберете место во домот каде имате убаво природна светлина. Заборавете на блицот од мобилен, тој не ви е пријател. Допрете го екранот на мобилниот за да ги подесите вредностите на експозицијата (осветленоста на сликата).
2. Најдобро е да фотографирате наутро. Од досегашното искуство бебушите се најрасположени за позирање и дружба откако ќе се разбудат наутро. Важно е да се чувствуваат добро, да се нахранети и да им е доволно топло за да можат среќно да си се успијат. Така најлесно ќе ги фатите преслатките поспани погледи.
3. Движете се. Фотографирајте го бебенцето од повеќе агли. Доближете се блиску за да ги фатите деталите, и застанете високо над бебушко за да ја фатите целата поза.
4. Бидете внимателни со позирањето. Не експрериментирајте бидејќи малите бебенца можете лесно да ги повредите. Поставете го бебенцето на грпче, меше или на страна, онака како што ќе му биде удобро. Не заборавајте дека вратчето секогаш мора да има поддршка. Во студио повеќето пози се прават со помошник, за фотосесијата да биде безбедна и удобна за бебенцето. Затоа ве молам комплексните пози оставете ги на професионалците.
5. Вклучето го целото семејство. Ова е голем момент, затоа е важно сите да бидете дел од фотографиите. Менувајте се кога ќе сликате, или наместете го апаратот на тајмер и сликајте се сите заедно.
6. Внимавајте на позадината. Често може да уништи совршено добра фотографија. Најчесто чиста и едноставна позадина е вистинскиот избор, зашто шаренила и многу позадински елементи знаат да го одземаат вниманието без потреба.
7. Обработете ги вашите фотографии со некоја апликација како Lightroom Mobile или слична за да добиете профи изглед.
8. Зачувајте си ги фотографиите. Направете копија на друга локација за да ги имате на безбедно.
9. Подгответе ги омилените фотографии за печатење со тоа што ќе ги организирате во посебен фолдер. Можете да си ги испечатите традиционално на фото хартија, или да направите убав постер, да ги испечатите на платно или да направите прекрасен фотобук кој ќе ви остане како убаво скоцкан спомен за целото семејство.
Во овие времиња мини фотобук е одлична идеја за подарок на блиските роднини кои веќе со месеци не се во можност да си ги видат внучињата. За повеќе информации околу начините за зачувување на вашите спомени можете слободно да ме контактирате.
10. Споделете ги вашите омилени фотографии. Вашите пријатели и роднини ќе уживаат во фотографиите од вашиот бебуш 🙂 Можете дури и да направите кратко слајдшоу или видео.
Уживајте и забавувајте се креирајќи спомени за вашето семејство, а ние се гледаме во студио за да направиме уште пофраерски семејни фотографии 🙂
No Comments